Sobiq "Toshkent" mehmonxonasi
Sobiq "Toshkent" mehmonxonasi (hozirgi Lotte City Hotel Tashkent Palace) Toshkentning qoq markazida joylashgan. Bino yonida Alisher Navoiy nomidagi teatr, "Moviy gumbazlar" xiyoboni va Knyaz Romanov saroyi joylashgan. Shaharning qiziqarli joylariga tashrif buyurish yoki shunchaki o'tgan asr o'rtalariga oid tarixiy binoni tomosha qilish uchun bu yerga sayrga chiqishingiz mumkin.
O'tmishdan zamonaviylik sari
"Toshkent" mehmonxonasi 1958-yilda qurilgan. Me'morlari M. S. Bulatov va L. G. Karash bo'lgan. Bino ancha g'ayrioddiy ko'rinishga ega: uning bezagida ham klassik shakllar — ustunlar va pilyastrlar, ham milliy naqshli elementlardan foydalanilgan. Inshoot П-simon shaklga ega. Mehmonxonaning asosiy korpusi besh qavatli, yon qanotlari esa to'rt qavatdan iborat. Tomida ochiq terrasa mavjud.
Bizning davrimizda mehmonxona standartdan tortib "Lyuks" toifasigacha bo'lgan 232 ta xonani o'z ichiga olgan zamonaviy otelga aylandi. Binoda uchta konferens-zal, spa-zona, bir nechta restoran va barlar mavjud. Tomdagi terrasadan Alisher Navoiy nomidagi teatrga ajoyib manzara ochiladi.
Mehmonxonani Toshkent markazi bo'ylab sayr marshrutiga kiritish qulay bo'ladi. Yuqorida sanab o'tilgan diqqatga sazovor joylardan tashqari, bino yaqinida, masalan, O'zbekiston tarixi muzeyi va Mustaqillik maydoni joylashgan.