Tashkent City Park
So‘nggi yillarda Tashkent City parki Toshkentning eng mashhur turistik joylaridan biriga aylandi. Bu yerga musiqali favvoralar shousini tomosha qilish, do‘konlarni aylanib chiqish yoki shunchaki zamonaviy va obodonlashtirilgan dam olish maskanida sayr qilish uchun kelishadi.
Tashkent City Park: nimalarni ko'rish mumkin
Park Tashkent City xalqaro ishbilarmonlik markazi tarkibiga kiradi. Majmuaga shuningdek, bu yerda joylashgan savdo markazlari, mehmonxonalar va turar-joy binolari ham kiradi. Park ushbu klaster markazida joylashgan.
O‘tmishda Tashkent City parki o‘rnida turar-joy, ofis va ma'muriy binolar joylashgan edi. Ularni 2015-yilda buzish boshlangan. Parkning ochilishi shundan to‘rt yil o‘tib bo‘lib o‘tdi. Bugungi kunda bu tumanning o‘tmishini faqat Orifjonboy masjidi (XX asr boshi) eslatib turadi. U park hududini obodonlashtirish vaqtida rekonstruksiya qilingan.
Tashkent City Park hududi — qariyb 18,5 gektarni tashkil etadi. Bu yerda piyodalar yo‘laklari yotqizilgan, dam olish zonalari mavjud. Hududda fastfud, muzqaymoq va ichimliklar sotiladigan bir nechta do‘konchalar bor. Hovuz yaqinida kafe va restoranlar joylashgan. Bu yerga bolalar bilan kelganlar Planetariy, Mashhurlar muzeyi yoki Uchar teatrga tashrif buyurishlari mumkin.
Parkning sharqiy qismida ikkita savdo markazi joylashgan — Tashkent City Mall va Park in Mall. Ularning birinchisida ko‘plab xalqaro brendlarning do‘konlari mavjud. Ikkinchi SM kichikroq bo‘lib, u yerda asosan mahalliy ishlab chiqaruvchilarning do‘konlari ko‘proq.
Ko‘pchilik Tashkent City parkiga yorqin musiqali favvoralar shousini tomosha qilish uchun keladi. U bu yerda issiq fasllarda kechqurunlari o‘tkaziladi. Bu manzarani hovuz bo‘yidagi bir nechta zonalardan, amfiteatrdan yoki kafedan tomosha qilish mumkin. Oxirgi variant, ehtimol, eng qulayidir, ammo stollardagi joylarni oldindan band qilib qo‘ygan ma'qul.
Agar siz shaharning boshqa musiqali favvoralarini ko‘rishni istasangiz, Magic City parkiga boring yoki Seoul Mun qirg‘og‘i bo‘ylab sayr qiling.
